កូឡុំប៊ី៖ មនុស្សយ៉ាងតិច ២៧នាក់បានបាត់បង់ជីវិតក្នុងហេតុការណ៍រអិលបាក់ដីមួយ តាមបណ្តោយផ្លូវមួយខ្សែស្ថិតនៅភាគពាយព្យ ប្រទេសកូឡុំប៊ី។ មនុស្សដែលបានបាត់បង់ជីវិត ភាគច្រើនគៀបជាប់ដោយបំណែកដីក្នុងរថយន្តក្រុង និងខ្លះទៀតសង្កត់ជាប់ជាមួយយានជំនិះផ្ទាល់ខ្លួន។ នេះបើតាមការប្រកាសដោយប្រធានាធិបតី Gustavo Petro កាលពីម្សិលមិញ។

លោកប្រធានាធិបតី Petro បានសរសេរក្នុង Twitter ផ្ទាល់ខ្លូនថា ក្នុងឱកាសដ៏៏សោកសៅនេះ ខ្ញុំសុំប្រកាសពីការបាត់បង់ជីវិតរបស់មនុស្ស ២៧នាក់ ដែលក្នុងនោះមានកុមារ ៣នាក់ ក្នុងហេតុការណ៍បាក់ដីមួយក្នុងតំបន់ Pueblo Rico។

កាលពីថ្ងៃអាទិត្យ មានការប្រកាសពីការបាត់បង់ជីវិតមនុស្សត្រឹមតែ ៣នាក់ប៉ុណ្ណោះ ខណៈក្រុមសង្គ្រោះរាប់សិបនាក់បានចេញប្រតិបត្តិការសង្គ្រោះ។ តាមសាក្សីក្នុងហេតុការណ៍ជាអ្នករួចផុតជីវិតបានបញ្ជាក់ថា អ្នកបើករថយន្តក្រុងបានព្យាយាមគេចចេញពីហេតុការណ៍បាក់ដីដ៏អាក្រក់បំផុត។ គួរបញ្ជាក់ថា រដូវវស្សានេះមានភ្លៀងធ្លាក់ជោគជាំយ៉ាងអាក្រក់បំផុតក្នុងរយៈពេលប្រមាណ ៤០ឆ្នាំចុងក្រោយ ដែលនាំឱ្យមានហេតុការណ៍គ្រោះថ្នាក់ផ្សេងដែលបណ្តាលឱ្យមានមនុស្សយ៉ាងហោចណាស់ ២៧០នាក់ហើយបានបាត់បង់ជីវិត៕